Advertisement

ساكن فكاريان – قصة قصيرة للكبار

Advertisement

ساكن فكاريان

أنا ساكن فكاريان..مكنفهمش فالحب بزاف ولكن كنقرى الكتوبة ديال “كافكا” وكنستمتع بالرويات ديال “أورويل” و”باولو كويلو”…ضرباتني الغيقة مع الوحدة دالليل ومخلي الوحدة ناعسة..غطيتها ومشيت جيهة البالكون باش نستمتع بالنجوم فالليلة الظلماء على طريقة الأرسطقراطيين…البالكون كاين فدماغي حيت انا ساكن فكاريان..تخيل حتى الشراجم معندناش…

خرجت كنشوف فالسما وكنستمتع بالنجوم وريحة القادوس خانقة الجو…راجع كنجري للبراكة لقيت خوتي مستفين بحال السردين حيت عندنا بيت واحد..كعاني داك المنظر وقلت نبدل ساعة بخرى…سولت راسي واش نقدر نلقى شي كافي باقة حالة مع الوحدة دالليل نغيرو الجو شوية ؟..جاوبني وقال ليا نمشيو نشوفو عالله…

شاد الطريق دقة دقة..كولشي ناعس..غير الخلا والمشاش والكلاب كتنبح..والأفكار فدماغي ساكتة..الحمد لله الكافي حالة..جالس بوحدي أنا والكراسي و”ميز أونكوغ” فالتلفازة..عاصر كنتسنى فقهوة كحلة باش نصفي عقلي شوية والسرباي كيشوف فيا شوفة ناقصة..شوية جا عندي وقلت ليه شي قهوة كحلة..شاف فيا مزيان وقال ليا لقيتينا غانسدو…

اشنو زعما متخليناش نتكونصونطراو واحد نص ساعة را خوك مهموم وشبعان مطارق ؟
– مايمكنش ليا..أنا غير خدام..هانتا شوف راه حتى ديك القهوة مكاينش لي يصايبها ليك..الخدامة جمعو حوايجهم..وهذا هو الوقت فاش كنسدو..
جمعت النوضة وخرجت..شاد الطريق ومعارفش فين غادي..غير غادي..شوية الساطة كاتعيط..

– آلو..
– آلو حبيبي..صافا ؟
– انا بيخير نتمنى تكوني بيخير..
– فينك بعدا ؟
– أنا فالدار..
– ولكن كنسمع صوت الطوموبيلات حداك…واش باقي دايع فالزنقة عوتاني..
-لا أنا فالدار..ناعس حدا الشرجم..وداك الصداع غير حيت دارنا جات حدا الشارع..

– آه واخا…قول ليا احبيبي واش تعشيتي ؟
– آه تعشيت..كليت واحد البيتزا ماقدرتش نكملها..
– حتى أنا بحالك..تعشيت على برا مع صحاباتي فواحد ريسطو تقام عليا داكشي غالي شوية ولكن داكشي زوين..
– آه بصحتك..
– حبيبي كنسمع صوت الطوموبيلات والكلاب كتنبح حداك والصداع..قول ليا واش خارج ومتكذبش عليا..

– فين عمرني دخلت باش نخرج..
– حبيبي مالك..هضرتك معجبانيش..واش بيك شي حاجة ؟
– آودي غير خليها على الله وصافي..
– قول ليا اشنو واقع..علاش باقي خارج تال هاد الوقت..سير دخل للدار..
– الدار ؟ اشمن دار ؟
– اش كاتقول ؟..

– باش نكون صريح معاك أنا مانليقش ليك..وغير كاضيعي وقتك معايا..
– اش هاد الهضرة كانسمع منك ؟ واش انا كندوز نهار كامل فتمارة وكنعيط ليك باش تنسيني فهمي ودابا كاتندمي ؟
– أنا مبقيتش باغي نكذب عليك.. انا مناعسش فبيتي كيف قلت لك وحتى النعلس مبقاش كيجيني..ومعنديش بيتي ودارنا مجاتش حدا الشارع ومعنديش طوموبيل وماتعشيتش بالبيتزا..تعشيت غير بالمرقة..خرجت نصور ليك النجوم كيف واعدتك باش نبان بحال “كافكا”..رجعت لقيت خوتي مستفين فبراكة بحال السردين..شفت داك الديكور لي كنت ديما كنتعمد منشوفوش وحقدت وخرجت كنقلب على شي كافي حالة نبدل فيها الجو..ساعة لقيت كولشي ساد..ومشيت جلست فواحد القنت..

خصك تعرفي بلي مدة طويلة وانا عايش فهاد الوضع وكنحاول نخبيه عليك ولكن عييت مانبقى نكذب على راسي ومابقيتش باغي نكذب..جا الوقت باش نتقبل الحقيقة..سمحي ليا مانقدرش نوفر ليك داكشي لي واعدتك بيه..أحلامك كبيرة وانا مانقدرش نحقق لك والو منها..ومابغيتش نبقى نضيع لك وقتك..نتي درية زوينة وألف واحد يتمناك..واحد مزلوط بحالي ماعندو باش يفيدك..عالمي صغير بزاف عامر بالفقر والبساطة والكتوبة..تستاهلي ماحسن..

– واش كيحساب ليك بغيتك على ود الفلوس ولا الديور ولا الطوموبيلات ؟..راك غالط بزاف، أنا ما باغة منك والو..مباغاكش تحقق ليا أحلامي..ولكن باغاك تحققها معايا..تكون فجنبي ونحققو أحلامنا بزوج..مكيهمنيش فين كاتعيش واشنو كتاكل واشنو كتلبس..كيهمني داكشي لي فالداخل ديالك..داك الحب ودوك المشاعر الصادقة وديك الصراحة لي فيك..وحتى كون صارحتيني قبل مكنتش غانتخلا عليك..انت ممحتاجش تبقى تكذب عليا باش تعحبني ولا باش تبان راجل فعينيا..انت غاتبقى ديما راجل فعينيا حيت الرجال مكتصنعهومش الفلوس والحديد والديور..الرجال كاتصنعهم النفس والظروف..انا مستعدة نعيش معاك فداك العالم الصغير ديالك لي عامر بالفقر والبساطة..نعيشو بالخبز والماا والكتوبة ديال “كافكا”…نوض رجع فحالك باش تكمل ليا ليسطوار ديال 11 دقيقة..

Advertisement
شارك المقال لتعم الفائدة :