Advertisement

ماهي متلازمة اليد الغريبة ؟ بالدارجة المغربية

Advertisement

تمهيد

عمرك تخيلتي انك تقدر تقتل راسك ؟ ولا عمرك تخيلتي تقتلك يدك ؟ اش بان ليك ايلا قلت ليك غاتقتلك يدك واخا نت لي كتحكم فيدك ماشي يدك لي كتحكم فيك، تيقني ايلا قلت ليك يدك غاتقتلك واخا نت مباغيش تقتل راسك ؟ نمشيو للموضوع ونتعرفو على متلازمة اليد الغريبة .

ذات صلة : متلازمة فريجولي بالدارجة المغربية

تعريف متلازمة اليد الغريبة

متلازمة اليد الغريبة موحال واش غاتكون سمعتي بيها وكنظن هادي اول مرة غاتسمع بيها، موهيم متلازمة اليد الغريبة هي واحد المرض عصبي، هاد المرض كايخلي المريض يفقد القدرة والسيطرة على يديه وفهاد الحالة اليد كتولي ديال شي حد خر مثلا ومكتبقاش تحكم فيها، هاد المرض كاتسبب فيه واحد الإصابة فالمخ ديال بنادم.

 أعراض متلازمة اليد الغريبة

الأعراض ديال هاد المرض من بينها فاش كتبدى دير شي تصرفات عدوانية مثلا تشد شعرك ولا تبدى تشد فالمناطق الحساسة والعضو التناسلي ديالك قدام بنادم ولا تبدى تقمص شي شخصيات خرين لدرجة تبدى تقول هاد اليد ماشي ديالي ولا راني مسكون بشيطان ولا فاش تبدى ضرب يدك بزيزوار ولا تخنق راسك وتضرب راسك وتضرب بنادم بدون سبب…هادي كلها أعراض ولكن شنو السبب فهادشي ؟

أسباب متلازمة اليد الغريبة

السبب ف”متلازمة اليد الغريبة” لحد الآن ماعرفوهش ولكن بعض الأطباء من خلال بعض التجارب لقاو بلي السبب راجع لواحد الخلل ف”الجسم الثفني” (Corpus Callosum)..هاد الخلل كاين ف”الألياف العصبية”فدماغك، وحنا عارفين الدماغ فيه جوج نصوصا واحد فليمن وواحد فليسر، هاد الألياف العصبية هي لي كتربط بين النصف الكروي الأيمن والنصف الكروي الأيسر فالدماغ، وكتسهل عملية الاتصال بين هاد جوج نصوصا على شكل اشارات كهربائية، وملي كيتضرب هاد الجزء الدماغي كيبدا يسيفط اشارات كهربائية غير طبيعية للمخ وبالتالي كيوقع خلل وكتفقد السيطرة على اليد ديالك.

تاريخ ظهور متلازمة اليد الغريبة

ايمتى بان هاد المرض وشكون اكتاشفو ؟ هاد المرض كتاشفو الطبيب “كورت گولدشتاين” هاد طبيب ف 1908 دار واحد تقرير على أغرب حالات مرضية فالتاريخ من بين هاد الحالات واحد سيدة عندها شي 40 عام هاد سيدة وقعات ليها جلطة دماغية و نجات بأعجوبة من هاد الجلطة ولكن وقع ليها شلل نصفي فالجانب الأيسر، ومع الوقت بدات كتبرا شوية بشوية ولكن من بعد 10 شهور ديال العلاج عند هاد طبيب، هاد سيدة شافت شي حاجة غير طبيعية، شافت يديها ليسرية كتحرك بلا متحكم فيها ومقدراتش تسيطر عليها بحالا متحكم فيها شي حد خر، السيدة تخلعات وتزعزعات نفسيتها ومن بعد مدة ديال المعاناة ماتت غا بالخلعة.

وكاينة واحد ليسطوار على واحد سيدة خرى عندها 68 عام هاد سيدة وقع ليها خلل فالمخ ديالها وداوها لسبيطار، من بعد هاد سيدة قالت ليهم بلي شافت شي شبح كيحرك ليها يديها ولكن الأطباء قالو ليها راك غير كتوهمي بسبب الإصابة من بعد غادي تخنق واحد سيدة كانت غتقتلها ومن بعد مدة خنقات راسها هنا الأطباء تدخلو ودارو معاها اطونسيون وتاخدو اجراءات وتأكدو بلي هاد المرض فعلا كاين وماشي وهم.

علاج متلازمة اليد الغريبة

واش كاين شي علاج لهاد المرض ؟ لا للأسف مكاين حتى علاج حيت المرض عندو علاقة بالألياف العصبية فالمخ ولكن كاينين بعض العمليات بحال الترويض في حالة كنتي مريض بهاد المرض ومقدرتيش تحرك يدك، تيقتي دابا بلي تقدر تقتلك يدك ؟

موهيم هادشي لي كاين هادي هي “متلازمة اليد الغريبة” نتمنى يعجبكم الموضوع نتلاقاو فشي موضوع خر.

Advertisement
شارك المقال لتعم الفائدة :