تمهيد
كلنا كنعرفو بلي العقل هو اللاكس ديال بنادم والمحرك الرئيسي لجميع الأعضاء فالجسم ديال بنادم، ويلا مشى دماغ مشى كولشي، فهاد الموضوع غنهضر على واحد المرض نفسي فشي شكل ماعرفتش واش غتكونو سمعتو بيه ولا لا، موهيم نمشيو للموضوع ونتعرفوا على متلازمة وهم كابجراس .
ذات صلة: ماهي متلازمة الجنية العجوز “الجاثوم”؟ بالدارجة المغربية
تعريف متلازمة وهم كابجراس
متلازمة وهم كابجراس هي واحد المرض نفسي كيبدى يخلق أوهام لبنادم، ماشي أوهام عادية لا لا، المصاب بهاد المرض كيبدى يتوهم بلي شي حد بدل ليه مرتو ولا ختو ولا صاحبو ولا مو، كيفاش؟ المصاب بهاد المرض كيبدى يتوهم بلي مرتو بدلوها ليه يعني هاديك ماشي مرتو لي كان كيعرف واخا هي فالحقيقة راها مرتو ولكن المرض كيخليه يتوهم بلي هاديك ماشي مرتو يعني تم استبدالها بمرا خرى كتشبه ليها ونفس الشيء مع بنتو ولا ختو ولا مو ولا باه…الخ، المصاب بهاد المرض يقدر يدير اي حاجة فهاد الحالة، يقدر يقتل مرتو ولا اي واحد توهمو بلي ماشي هو هذاك ويقدر يهرب كاع ويخوي الدار حيت كيحس براسو غريب فديك الاسرة وهاديك ماشي مرتو وهادوك ماشي عائيلتو واخا هوما فالحقيقة عائيلتو.
أعراض متلازمة وهم كابجراس
من الاعراض ديال هاد الاضطراب النفسي: فاش كتحس بلي شي حد من عائيلتك ولا صاحبك ولا مرتك تبدلات عليك وكتشوفها بلي ماشي مرتك وكتحس بلي بدلوها ليك، نعطيكوم واحد ليسطوار باش تفهمو مزيان.
قصة لسيدة مصابة بمتلازمة وهم كابجراس
كانت واحد السيدة كبيرة شوية فالعمر مرضات بهاد المرض وولات كتوهم بلي راجلها بدلوه ليها وهذاك ماشي راجلها الحقيقي لي كتعرف هادشي خلا هاد السيدة ترفض راجلها ينعس حداها وتكرهو بدون سبب وناضت سكنات فبيت ديالها بوحدها وسدات على راسها حيت خايفة لايقتلها ومن بعد ناضت شرات فردي باش دافع على راسها من راجلها الوهمي مع العلم راجلها مدار ليها والو من بعد مشات ديكلارات بيه ولكن البوليس عرفوها مريضة بهاد المرض ودخلوها لمصحة عقلية..
أسباب متلازمة وهم كابجراس
هاد المرض كيتعرضو ليه الناس لي عندهم مرض السكيزوفرينيا والناس لي عندهم مرض الاعصاب بالاضافة للشيخوخة حيت هاد المرض كيمرضو بيه بزاف الناس الكبار فالسن ومن الاسباب لخرى كاين مرض الصداع النصفي الناس لي كيكون عندهم صداع نصفي كيكونو معرضين لهاد المرض وكاين سبب خر هو فاش كتعرض لشي صدمة من شي حد مثلا فاش كتبغي شي وحدة وكتصدم فيها من بعد وكتلقاها كتخونك فهاد الحالة كتبدى تقنع راسك بلي ماشي هادي هي ديك فلانة لي كتبغيها يعني تم استبدالها (تبدلات)، واخيرا البلية ثم البلية هي من الاسباب لي كاتخلي بنادم يتصاب بهاد المرض.
علاج متلازمة وهم كابجراس
فهاد الحالة لابد تزور طبيب نفسي وتبقى تستعمل بعض الادوية المهدئة.
هاد المرض كيف قلت فاللول عندو علاقة بالنفسية ديال بنادم لذلك بنادم خصو يضرب حساب وميبقاش يعدب فراسو بالتخمام والمشاكل اليومية لي تقدر تخلق ليه مشاكل نفسية من بعد، بنادم خصو يضرب الدنيا بركلة حيت هاد الامور كلها كتخلي أثر فالنفسية ديال بنادم وتخليه يعيش منعازل على البشر ويدير علام ديالو بوحدو وبعيد من الواقع وهادشي يقدر يخرج فبنادم شي حوايج عمرو ماكان ضارب ليهم حساب لدرجة يقدر يتسطى ويولي يتوهم شي حوايج مكاينينش كاع لذلك الإنسان خصو يعرف كيفاش يعيش ويواجه المشاكل لي عندو وميبقاش مخبي ويعطيها للتفكير.
