ماهي متلازمة الجنية العجوز “الجاثوم”؟ بالدارجة المغربية

تمهيد

كاتكون ناعس حتى كيشدك الشلل وكتحس براسك باغي تهضر ومقادرش والجسد ديالك تشلل ومكتقدرش تحرك كتبغي تغوت وتعيط لشي حد يعتقك والو حتى واحد ماكيسمعك، كنظن كلنا عشنا هاد القضية ولكن معرفناش علاش كيوقع لينا هادشي، نمشيو للموضوع باش تعرفو على ماهي متلازمة الجنية العجوز “الجاثوم” “Old hag Syndrome”.

ذات صلة: متلازمة كورو – الخوف من تقلص الاعضاء التناسلية بالدرجة المغربية

تعريف متلازمة الجنية العجوز

“الجاثوم” أو “عفريت النوم” أو “متلازمة الجنية العجوز” هو واحد الشلل كيتعرض ليه بنادم فنعاسو ومباشرة من بعدما كيفيق، كتحس براسك واعي بداكشي لي ضاير بيك وكتشوف ولكن ماكتقدر دير والو، كتبغي تنوض ولكن مكتقدرش تحرك كتبغي تغوت ولكن حتى واحد مكيسمعك وكتحس بشي حد رابطك وباغي يخنقك.

سبب التسمية بمتلازمة الجنية العجوز

هاد المرض كايسميوه الغرب ب”متلازمة الجنية العجوز”..علاش ؟ حيت كانو شي وحدين كيحساب ليهم بلي كاتجي واحد السيدة شارفة وكتجلس لبنادم على صدرو ومكتخليهش يتحرك ولا يتنفس، علاش كايوقع لينا هاد “الجاثوم” او “شلل النوم”؟..اولا خصكم تعرفو بلي الانسان فاش كينعس كيدوز من جوج ديال المراحل، شنو هوما هاد المراحل ؟ المرحلة اللولة سميتها “النوم الغير الحالم” والمرحلة الثانية سميتها “النوم الحالم”.

بنادم قبل مايغطس فنعاس كيعيش مرحلة “النوم الغير الحالم” عاد كيدوز لمرحلة “النوم الحالم” فهاد المرحلة بنادم كايترخى وكايترخاو كاع العضلات ديالو باش ينعس باستثناء عضلة “الحجاب الحاجز” كتبقى خدامة باش نقدرو نتنفسو بالاضافة لعضلة العين، وفهاد الحالة ديال مرحلة “النوم الحالم” الانسان كيبدى يحلم مثلا كتحلم براسك مضارب، لنفرض ماوقعش داك الارتخاء ديال العضلات را فهاد الحالة غتبدى تضرب بيديك ورجليك بحالا مضارب بصح واخا نت غير كتحلم ويلا كان ناعس حداك شي حد غاتهرس ليه وجهو ولا تفوت فيه شي ضربة اما فاش كيترخاو العضلات را واخا تحلم براسك مضارب را غتبقى فبلاصتك وحتى يديك ورجليك مغيتحركوش هادي بين قوسين باش تعرفو الاهمية ديال ارتخاء العضلات وكون ما النعمة ديال هاد الارتخاء كون ناض بنادم فنعاسو ونقز من شرجم.

هاد “شلل النوم” كيوقع لبنادم فاش كيفيق قبل من انتهاء مرحلة “النوم الحالم” فهاد الحالة بنادم كيتصاب بواحد الهلوسة بصرية وسمعية وكيولي واعي بكاع الاشياء لي ضايرة بيه ولكن مكيقدرش يتحرك ولا يدير شي حاجة وكيحس بشي حد رابطو ومكيخليش الصوت ديالو يخرج وكيتخلع وكيشوف مثلا شي حد هاز موس وجاي باغي يقتلو وكيبغي يغوت لشي حد يعتقو ولكن حتى حد مكيسمعو حيت الصوت ديالو مكيخرجش.

أسباب متلازمة الجنية العجوز

متلازمة الجنية العجوز أو مايسمى ب”الجاثوم” أو “شلل النوم” اولا خصكم تعرفو بلي هاد الشلل مكيفرقش بين صغير وكبير وبين مرا وراجل لا لا أي واحد فينا ممكن يتصاب بهاد الشلل ومن الأسباب ديال هاد “الجاثوم” فاش كتحرم راسك من النعاس كتبقى سهران ومكتنعسش بزاف ولا العكس يعني كتنعس بزاف كثر من القياس وفاش كيكون نظام النوم عندك معربز يعني عشوائي ومامنظمش وقت النعاس وفاش كتكون عندك ظغوط نفسية بحال الاكتئاب وكاتستعمل شي ادوية ماشي تال لهيه وفاش كتنعس على ظهرك.

علاج متلازمة الجنية العجوز

واش كاين شي علاج لهاد المرض ؟ آه كاين علاج، خصك تنظم وقت النوم ووقت الفياق يعني تنعس فالوقت وتفيق فالوقت ماشي تنعس مع 2 ديال ليل وتفيق مع 5 ديال صباح هكا كتعدب راسك، وخصك تمارس السبور مرة مرة ضربها بجرية مع صباح، خصك تقلل من التخمام ومتبقاش تخمم بزاف وتخرج من الهموم ومتبقاش كاعي، خصك تستعمل بعض الادوية المضادة للإكتئاب في حالة كايوقع لك هاد الشلل بزاف حيت هاد الادوية كاتقلل من نسبة التعرض لشلل النوم، وحاول متبقاش تنعس على ظهرك ونعس على جنبك ليمن كيف كيقول سيدنا رسول الله عليه الصلاة والسلام “(إذا أويت إلى فراشك وأنت طاهر فتوسد يمينك)”.