تمهيد
شحال من واحد كيكون ناعس ماعليه مابيه حتى كيصبح ميت وشحال من وحدة كيتزاد عندها ولد كتنعسو كتفيق كتلقاه مات بدون سبب ولكن علاش ؟..نمشيو للموضوع ونتعرفوا على متلازمة الموت المفاجئ .
تعريف متلازمة الموت المفاجئ
متلازمة الموت المفاجئ أو الموت الليلي هو موت غير متوقع، كيكون بنادم مابيه ماعليه حتى كيموت على غفلة، هاد الموت كيستهدف بنادم فاش كيكون ناعس، الموت المفاجئ اول مرة كتاشفوه العلماء ف1977 كانو شي لاجئين من آسيا فميريكان نعسو ومفاقوش ومع العلم معندهم حتى مرض ووقعات هاد القضية فسنغافورة ومات فيها 230 واحد فتمانينات والأطباء بينو ملي معندهوم حتى مرض وصحتهم مزيانة ولكن اسباب الموت مجهولة، هاد مرض الموت المفاجئ كان منتاشر بزاف فالفيليبين وكتقول بعض الاحصاءات بلي ماتو شي 100 الف فيليبيني بهاد الموت المفاجئ…
أسباب متلازمة الموت المفاجئ
اشنو هي الاسباب ديال هاد مرض الموت المفاجئ ؟، اغلب الناس لي ماتو بهاد المرض او هاد الاضطراب كانت صحتهم طبيعية ومامراضش وكتبقى الاسباب مجهولة ولكن كاينة بعض الاسباب مرتابطة بالاعتقادات مثلا فالتايلاند كيقولو بلي الأرز هو لي كيتسبب فهاد الموت المفاجئ وف الفيليبين كيقولو بلي هاد الموت كيتسبب فيه تناول “الكربوهيدرات” قبل النعاس، هذا الاعتقاد ديالهم، العلماء بداو يحللو هاد الضحايا باش يشوفو الاسباب ديال هاد الموت المفاجئ ولكن مالقاو حتى شي سبب عندو علاقة بالمرض مثلا حيت كاع الضحايا صحتهم جيدة..ولكن اكتاشفو بلي هاد الموت كاتسبب فيه دقات القلب الغير منتظمة..هادشي خلا الفيليبيين يلويو صبع رجليهم الكبير (إبهام) باش يتقاد نظام دقات القلب…فالفيليبين قالو بلي هاد الموت كيتسبب فيه الرعاف (نزيف) والإلتهاب الحاد فالبنكرياس..
علاج متلازمة الكوت المفاجئ
واش كاين شي علاج لهاد المرض ؟ نعم كاين علاج باش ماطيحش فهاد المشكل كايوصيو العلماء بزراعة جهاز منظم لضربات القلب بحال “البروبرالولول”، كاينين ناس ربطو هاد الموت بعدة اسباب اما امراض اما معتقدات ولكن فواحد الجماعة ف لاووس سميتها “همونق” هاد الطائفة كيقولو بلي هاد الوفيات كاتسبب فيهم روح الشرير “دا تشو” وهاد الشرير كيكون على شكل امرأة باش يقتل الرجال هاد الاعتقاد خلا الرجال ديال ديك الجماعة يلبسو حوايج العيالات ويتشبهو بالعيالات عاد ينعسو باش زعما مايعيقش بيهم الشرير حيت كيقتل غير الرجال وهكا غادي يتفاداوه، وفالفيليبين كيقولو بلي هاد الوفيات كيتسبب فيها واحد المخلوق اسطوري سميتو “باتي بات” هاد المخلوق كيجلس للضحية على وجهو ويخنقو حتى يموت.
هاد متلازمة الموت المفاجئ اكثر الناس لي كيتعرضو ليها وكيموت فرمشة عين هوما دراري صغار لي يالاه تزادو، ولكن كاينين بزاف ديال الاسباب مكيرضوش ليهم الامهات البال، بحال دراري لي كينعسو على كرشهم فهاد الحالة كاتضياق عندو القصبة الهوائية وكيضعاف التنفس عند الطفل ومكيتنفسش بزاف وبالتالي كيتخنق ويموت لذلك ايلا عندك دري صغير نعسو على ظهرو ولا جنبو وكايوصيو الاطباء الناس لي عندهم دراري صغار مينعسوش حداهم ويديرو ليهم فراش خاص بيهم ويكون مهوي وشي كليمة فالبيت باش يسهال عندهم التنفس حيت حتى الحرارة من اسباب الموت المفاجئ للأطفال..اما بالنسبة للمراهقين والناس الكبار السبب الوحيد وهو سبب احتمالي لي وصلو ليه الاطباء هو عدم انتظام دقات القلب والمتدينين كيقولو بلي قدر الله ونهاية الأجل.
