متلازمة فريجولي بالدارجة المغربية

تمهيد

عمرك تخيلتي ان كاع الناس لي كتعرفهوم هوما شخص واحد واخا كيبانو ليك بزاف؟ عمرك تخيلتي ان صحابك لي كتعرف كولهم مجرد شخص واحد وبلي هوما نسخة وحدة بنفس الوجه وبنفس الكاراكطير فقط كيختالفو غير فالملابس لي كيلبسو، طبعا عمرك غادي تخيلها، نمشيو للموضوع ديال متلازمة فريجولي.

كيف كنعرفو الشخصية ديال كل واحد فينا مركبة من الاحاسيس والسلوكات والافكار، هاد الاشياء بتلاثة هوما لي كايخليونا نديرو شي حاجة ولا منديروهاش، ولكن الشخصية ديالي كتختالف على ديالك وعلى ديال لاخر من خلال هاد الصفات التركيبية لي كاتكون منها الشخصية ديال كل واحد فينا، ماعندناش نفس الافكار معندناش نفس المشاعر والاحاسيس ماعندناش نفس التصرفات والسلوكات، اذا كنختالفو على بعضياتنا، وبناء على هاد الاختلاف فالشخصيات ديالنا كاين اختلاف حتى فالإضطرابات النفسية والشخصية لي ممكن نتصابو بيها.

وكيف كنعرفو ايضا ان اضطراب الشخصية هو ديك الحالة لي كايخرج فيها الانسان على طبيعتو الفطرية ومكيبقاش يتأقلم بشكل طبيعي مع الحياة ومع الاشياء والحوايج لي ضايرة بيه وبالثالي فهاد الحالة هاد الشخص المضطرب كيبدى يعيش أزمات وكيبدى يعاني حيت مكيبقاش قادر يتقبل هاد الامر وهادشي لي طراا ليه وهاد التغيير لي ولا عندو فحياتو.

ايلا تعمقنا فأغلب المشاكل والاضطرابات النفسية غادي نلقاو ان السبب كيرجع بالدرجة اللولة للمشاكل الوراثية والمشاكل العائلية وعدم الاستقرار النفسي والعاطفي وكاع التجارب المؤلمة لي كيعيشها الانسان، هاد الامور كولها كيكون عندها تأثير كبير فشخصية الانسان.

ذات صلة : متلازمة وهم كابجراس Capgras Delusiôn Syndrome بالدارجة المغربية

تعريف متلازمة فريجولي

متلازمة فريجولي هي واحد الاضطراب نفسي فشكاال وغريب..هاد الاضطراب كايخلي المصاب بيه يتوهم بلي كاع الناس لي ضايرين بيه هوما شخص واحد متعدد، يعني عائيلتو وصحابو وعشرانو كولهم هوما شخص واحد وبلي اشكالهم كاتغير وكيبقاو يتنكرو فملابس وكيبقاو تابعينو فيما مشى باش يبرزطوه، مثلا شدينا هاد الشخص المصاب بهاد الاضطراب وديناه لشي سوبرمارشي ولا شي مول وحطيناه وسط الناس، هو غيبداو يبانو ليه كاع الناس لي تما على شكل شخص واحد ومنو نسخ بزاف يعني كيتشابهو وعندهم نفس الوجه وكل واحد لابس فشكل وغيبدى يحس انهم باغين يتبعوه ويمرضوه، في حين فالحقيقة هو غير كيتوهم والناس كاع مامسوقين ليه.

سبب التسمية بمتلازمة فريجولي

الإسم ديال هاد الإضطراب كايرجع لواحد الممثل مسرحي سميتو “ليوبولد فريغولي” هاد السيد معروف سريع بزاف كايبدل حوايجو بشكل سريع بزاف فالعروض المسرحية لي كيقدمها وأول العلماء لي هضرو على هاد الاضطراب هوما الثنائي “كوربون” و”فايل” فعام 1927 مباشرة من بعدما جات عندهم واحد السيدة من “لندن” قالت ليهم بلي شي ممثلين من المسرح تابعينها وبلي هوما عندهم نفس الوجه وهوما شخص واحد.

أسباب وأعراض متلازمة فريجولي

الأسباب والمشاكل

بالنسبة للأسباب كان صعيب على العلماء يتبثوها من خلال الدراسات العلمية لي حاولو من خلالها يفهمو هاد المرض العجيب ولكن تافقو بلي كاينة بعض الاسباب لي ممكن تساهم فظهور أعراض “متلازمة فريغولي” ومن هاد الاسباب لي ذكروها هوما بعض الادوية ديال “الباركنسون” والامراض العصبية زائد بعض الاصابات الرأسية بحال السكتة الدماغية ومرض الزهايمر.

بالنسبة للمشاكل الدماغية قالو العلماء انها يمكن تساهم فظهور اعراض هاد الاضطراب ودارو واحد الدراسة بزعامة “فاينبرغ” على الدماغ ولقاو بلي كاين واحد التقارب كبير بين المشاكل الدماغية والذاكرة ومتلازمة فريغولي ولكن إلى يومنا هذا مكاين حتى شي دراسة علمية كتأكد الاسباب الحقيقية لي كتسبب فهاد المرض..كما ان نسبة انتشار هاد المرض قليلة بزاف ويالاه 0.12 فالمية ديال الناس لي كيتصابو بيه.

الأعراض والآثار الجانبية

الاطباء كيقولو ان “متلازمة فريجولي” كتكون عند الناس لي عندهم انفصام فالشخصية (سكيزوفرينيا) والناس لي مراض بثنائية القطب ولي عندهم الوسواس والناس لي عندهم هاد “متلازمة فريغولي” كيعانيو من بزاف ديال الحوايج من بينها:
الهديان كيأثر على القدرة العقلية ديالهوم وكينقص ليهم فدرجة الوعي، زائد فقدان الذاكرة مؤقتا يقدر مترجعش ليه وتقدر تعطل، وكيبدى يهلوس ومكيبقاش يفرق بين ذاتو والوعي ديالو، كيكون واعي ولكن مكيقدرش يتحكم فراسو وفالتصرفات ديالو، وكيبقى ديما خايف ومتوتر ومقلق وكيكون ديما مندافع.

علاج متلازمة فريجولي

كاين العلاج الدوائي لي غالبا الاطباء كينصحو فيه بالادوية المضادة للإكتئاب والقلق والادوية المهدئة وكاين العلاج النفسي لي كايحاول فيه البسيكولوغ باش يعالج المريض ويعاونو باش يحقق الوعي الكامل ديالو باش يقدر يحقق واحد التوازن نفسي فذاتو وباش يقدر يتخلص من المرض.